Saturday, April 12, 2008

الحلم

أكتب بايديا نظرة عينيك .. وأقراها
يطلع كل معنى جوة روحك .. يرتاح فى حضنى الدفيان
كل حبة أمل .. وحبة نور
وجوز أحلام
وحكايات غرقانة حنين .. غرقانة سنين
عارف معناها
فتسند رأسك جوه حكايتى
تشوف وشك جوه مرايتى ..
تقفل عيونك وتنام
أهدهدك لجل ما تطمن
وأضرب بسنينى كل العفاريت الشاردة وسنين الضلمة
أغنيلك .. غنوة حزينة
كان يا ما كان
كان إنسان
عيونه حزينة وقلبه كبير
روحه وسيعة وحلمه أمير
راكب فرسه .. بيجرى فى أرضه وأرض الناس ..
يتقلقل نومك ..
تلاقينى نعسان
تهدهد فيا
أنام فى عيونك

No comments: