Saturday, April 12, 2008

رباعيات

· مخنوق وكأن ضلوعي قضبان
مقبوض مش لاقي لحظة أمان
بأدور على نور
والنور مني هربان
والبرد قاتل مشاعري
وجوايا ثورة بركان


· قلبي بينبض واجعني يا خلق
عقلي بيشغي بينور برق
وبين دا ودا أنا مطحون
وبعد كل رحلة بأرجع أرق

· مسيرنا نتقابل على بوابات الرحيل
ويبدل ضحك لقانا لصراخ وعويل
يا ترى هيفضل قدرنا دايماً فراق
ولا ممكن يتحقق حلمي الجميل

· صوابعه بني من الدخان
قلبه أخضر م الحنان
عيونه زايغة بتدور
إيه معنى وجود الإنسان ؟‍‍

· وبعد هالك يا أنا إيه آخرتك
بتلف وتلف مش لاقي سكتك
خايف في يوم يقولوا عليك مجنون
أو تفضل وحدك زي كلب السكك

· ما أصعب الغربة وأنا بين الأهل
ونظرة العيون اللي مليانة جهل
حاسس إني مش من هنا
حاسس – رغم شبابي – إني راجل كهل




· واحد شبعان ومخه مش رأسي
وواحد ثاني م الجوع بيقاسي
الاتنين رافضين وحاسين بالظلم
والدنيا كده ما تعالج مآسي


· ليه يا قلبي حابس دمعتك
خايف تبكي ما حدش يسمعك
ما تبكي يا قلب و علي النحيب
كتم البكا هو اللي يموتك

· وماذا يبقى من عمري
بعد أن تذهبين 000 ؟!
ومن يزين حديقتي
بعد هروب الياسمين ؟




















No comments: